خلوج تجذ القلب باتلى عوالها

تكسر بعبراتٍ تحطم سلالها

تهيض مفجوع الضمير بحسها

الى طوحت حسه تزايد هجالها

له قلت أنا يا ناق كفي عن البكا

لا تبحثين النفس عما جرى لها

لا تفجعين البال بالله هودّى

ولى خلوج خبث البين بالها

تبكين فرقا بكرة شدة العرب

ضاعت يمين البوش والا شمالها

تجيك يا ناق الخطا أو تجينها

وان كان ضاعت لك بديل بدالها

لكن أنا اليوم ما تنعد مصاوبي

ولا علتي تبرا ولا ينشكي لها

فلو البكا يا ناق عني يحلها

بكيت بيض أيامها مع ليالها

ولو البكا يا ناق يرجع لغايب

بكيت لين العين ييبس ثمالها

وابكي على الاثنين ما ذعذع الهوا

مدى الدهر لين النفس تلحق زوالها

وابكي على ما صاب نفسي وما جرى

وابكي على فتخان الايدي زلالها

وابكي على دار ربينا بربعها

معلوم خشم الرعن من شمالها

ومن شرق طعسين الأرخم تحدها

بين اللوى والسر ما اطيب سهالها

دار بنجد جنة كان قبل ذا

ومن صكته غبر الليالي عنا لها

وصفه من الخفرات بيضا عفيفه

يفوق كل البيض باهر جمالها

حسودها يغضى الى مر حولها

من خوف عيال تربوا بجالها

حي امنا واحلو مطعوم درها

غدتنا وربتنا وحنا عيالها

بزور بنا ما مثلها يكرم الضنا

وصول بنا لكن نسينا وصالها

تلقى علينا الجوخ والشال فوقنا

وهي عارية تبكي ولا احد بكى لها

ولا أحد جزع من صيحته يوم سبلت

ولا أحد نشد من بعد ذواش جرى لها

قلت آه واويلاه يا خيبة الرجا

كيف أمنا تهضم وحنا قبالها

يا طارش من فوق سراقة الوطا

هميم الى سارت ذعرها ظلا لها

حايل ثمان اسنين ما مس خلفها

ولا بركت للشيل جملة حمالها

الى بدالي لازم قلت شدها

واضبط عن الفزات مقضب حبالها

ولا نعتني بالخرج ماذي بحزته

شل قربة واجعل زهابك عدالها

فالى شلت خذلي بالرسن قدر ساعة

أبلغك في دق المسايل جلا لها

والى ختمته بالسلام فحثها

من دار ابو جابر سقى الغيث جالها

اوصيك يا مرسال بالسير والسرى

واحذرك نوم الليل عينك ينالها

الى سرتها عشر وخمس مغرب

مرواحك الشام منها منا لها

والى جيت سوق العصر ياتيك غلمه

تخثع بزينات البريسم انعالها

يقولون لك يا صاح عطنا علومك

بلدان نجد عقبنا وش جرى لها؟

قل كل بلدان القصيم وغيرها

عن الخوف زاموا دون جاله رجالها

مير داركم من عقبكم تندب الثرى

تبكي على الماضين واعزتا لها

ترى مركب الاخطار هو مصعد العلى

ولا يدرك المقصود غير احتمالها

وترى بالسيوف المال والعز والبقا

والجنة الخضرا بخضرة ظلالها

قومو براي الله واقضوا ديونكم

أنتم هل القالات ما أنتم رذالها

مدام ابو جابر على العز والبقا

عنا ثقيلات الحمول ارتكى لها

الى احترك سبع القبايل تحركت

والى رسى ترسي رواسي جبالها