يالله يا والي على كل والي

ياخير من يدعى لكشف الجليله

المالك المعبود محصي الرمالي

الكون والدنيا وما به فهي له

ما كان له أول وما كان تالي

ملكه يدبر به على ما يبي له

يقضي ويمضي قادرٍ ما يبالي

والخلق ما تفعل بلا امره فعيله

ماله شريك جل فوق متعالي

علمه أحاط بدقها والجليه

أشهد فلا غيره آله ولا لي

ربٍ سواه أخشاه وأرجي النيله

ياواحدٍ فوق السموات عالي

من سطوته كل الخلايق ذليله

يا فارج الشدة بضيق الحوالي

افرج لعبدك يامنجي خليله

وانظر بعينك يا آلهي الحالي

فردٍ غريبٍ والمصاغي قليله

وحيد مالي غير ظلك أظلالي

ذليل مالي غير عزك وسيله

ياراحم ارحم شيبتي وانخذالي

ياجابر اجبر عثرتي والفشيله

والطف وناظر ياالولي في سوالي

لا تواخذان فيما مضى من فعيله

لا إخوان لا عمان لا من خوالي

ولا من صديقٍ بالوزى نشتكي له

لو كان ما يجلي سوى الله جالي

ماشفت عبدٍ هرجته لي جميله

تقطعت وذم العرى والمدالي

من جملة الخلان والمستخيله

قضيت من المخلوق ماحدٍ بقالي

إلا أنت ياللي ما يخلي عميله

عادوني كل الناس شرق وشمالي

ولا بقى غيرك ذراً نلتجي له

شافوني مذلولٍ وحيدٍ وخالي

والا لي من الفزعات مومي شليله

وأنا بعون الله امتانٍ احبالي

متجودٍ بحبال منشي المخيله

لو كان كلٍ له صديقٍ أموالي

أخوال واقرابٍ ولحدٍ قبيله

أنا لي اللي زابنه ما يسالي

جزل العطا مبري الجسوم العليله

إلى دعوا حيانهم فز بالي

رفعت طرفي له وقمت أشتكي له

واللي تنادوا بينهم للنوالي

ناديت بإسمك يامنشي المخيله

من لاذ بك ما صار بالضيق تالي

يصير الأول لو اعظامه هزيله

أنا دخيلك يا عزيز الجلالي

حاشا كرم جودك يضيع عميله

تبريت من غيرك بحالي ومالي

وزبنت أنا بحماك عن كل ميله

من شر خلقك لايذٍ بك ومالي

غيرك ملاذٍ شامخٍ ينعني له

يارب مالي غير جدواك وإلي

وإن كان خليتن فلا لي عقيله

ياعالمٍ با المخطيه والعدالي

تشوف مالي غير عدلك وسيله

فلا تؤاخذني بماضي أفعالي

يا ساتر العورات مضفي الجميله

لو كان ذنبي راجحٍ بالجبالي

عفوك عظيم ليس ذنبي عديله

أطلبك تقبل توبتي عن خمالي

وأطلبك عني كل كربٍ تزيله

وأطلبك تغفر لي وتصلح أعمالي

يا مزبن الخايف إلى باد حَيله

مولاي لا ملجأ ولا ملتجأ لي

إلا أنت ياللي ما يضيع نزيله

يا فزعة المضيوم منشي الخيالي

يا فارج الشدات لوهي ثقيله

أفرج لمن بالحبس دونه أرجالي

ابواب واقفال حصونٍ ثقيله

في وسط دبابٍ وحيدٍ الحالي

أظلم ولا أدري وش نهاره وليله

متروك مالي من يرد المقالي

لا أحد يبي قولي ولا أحد يشيله

ولا أحد غيرك عليه اتكالي

إلا أنت يامنجي دريك الدبيله

ما دام تنظرني وتسمع مقالي

ما خاب عبدٍ يدري أنك وكيله

يا سامعٍ بالليل حس النمالي

وصوت يونس في البحور الطويله

دعاء وضرب الموج مثل الجبالي

فوقه أجيبت دعوته وتهليله

يا مصرف الأيام هي والليالي

في قولته كن يجري القلم بتعديله

أدعوك بأسماك العظام الجزالي

وبحق ما خصت لك من فضيله

وبحق عظمة قدرتك والجلالي

وبحق نورك والأفعال الجميله

وبحق ما نزلت أول وتالي

تجيرني من شر خلقك طويله

وتزيل كرباتٍ علينا اثقالي

تغطلست مالي سوى الله دليله

أمن على قلبٍ يجول اجتوالي

يامسكن الروعات سكن جفيله

اسرع علينا يا قريب النوالي

لا تجعل الشده علينا طويله

يا فارج الكربه بضيق الحوالي

أومر العبدك بالفرج واتعجيله

واجل الأمور المعظله والجلالي

عن كل عبدٍ مسلمٍ يندعي له

صلاة ربي عد رمل السهالي

على نبيٍ وضح الله دليله

صفوة قريش اللي مشى بالعدالي

نبينا المعصوم عن كل ميله

تمت وفرجها عزيز الجلالي

فرحت بالطارش وقمت ادعي له