لاتظن اني قصدت ازعاجك

وألاّ جيتك اشكي قلّة مالي

لا ولا في نيتي احراجك

دام قدرك يالغلا متْعالي

حضرة الوالي ترا ديباجك

ناعمٍ له لمعةٍ اتْلالي

والمريض اللي دواه اعْلاجك

أدمن اللمعه ياجعْلك فالي

والظلام اللي قشعه اسْراجك

مالقى من يقشعه يالغالي

يالغلا في ذمتي محتاجك

انت تدري بْحالتي واحْوالي

فلها يالعنبوه احْجاجك

ابتسم احلى لك وْ أحلى لي

ياحلو البسمه على منهاجك

ترْقص الدنيا على موّالي

ليتني شمسٍ تنير افْجاجك

مالغيري مشرق وْ مدهالي

وان غربت احكم بسلطة تاجك

اصدر امر بْسجْني في منزالي

الأماني لا انْقفل مزلاجك

حاجةٍ أسعى لها تسعى لي

والله اني ما احتري افراجك

دامك اتْسوّي الذي في بالي

ولاتظن اني نويت احراجك

وانت قدرك يالغلا في العالي