ياهاجسي لا تعترض وسواسي

خله يترجم فكرةٍ في راسي

فكره وليده وامها حوريه

غابت وانا من بعدها محتاسي

تطري على بالي واجر الونه

والبيت يصلى من لهيب انفاسي

لاجيت اعبّر وانثر اللي داخلي

واكتب على بيض الورق بحساسي

ارجف وترجف في خفوقي عبره

دمعي غدى حبري على قرطاسي

وتزيل كُربة خاطري تنهيده

يصحو ا بها جيراني النّعاسي

يا شين عيشه عشتها من بعدها

لكّت المراره لكّ بين اضراسي

عيشه رديه ذقت فيها العلقم

واشدها شماتة الاخساسي

اللي بوجهي يظهروا تقديرهم

وقلوبهم متكدسه اكداسيي

بالكره والغيره وحقدٍ غاتم

اسود سواد الليل في الاغلاسي

هذا لأني فقتهم في مذهبي

حتى اعتلى فوق العلا نبراسي

والله ما عمري وطيت احماهم

ياسهلها ويا سهلها تنداسي

لكّن اعز النفس عن امثالهم

واطمح لصحبة جوهر الألماسي

اما قريبي اعذره لو بار بي

واقول يمكن عرق له دساسي

يامن ملكتي القلب حبك راسي

راسي بقلبي كلأشم الراسي

عامين فالديره ونا في ديره

حسبي على من خططو لعماسي

صبري نفذ ما عاد لي به طاقه

بعدك فلا لي خير في مجلاسي

والله لجيلك واهتني لو ساعه

لو كثروا من حولك الحراسي

ما يمنعونا لو هدفهم ذلك

دام الهوى ما بيننا متواسي