دامه سكن قلبي ويرجف من الخوف

خلّوه يبعد ما في قلبي مقابر

قلبي ترى ماهو ل ايمان أو نوف

قلبي لمن سوّاه والكل خابر

كل نجم كان ب ليلي الساكن يطوف

روّح وصار بدنيتي نجم عابر

والهم والآمال ما منهم يروف

هذا يبهدلني وهذي تكابر

والمشكله من دون مالناس اتشوف

في سكرتي عاشت جنون المحابر

مرتني الذكرى ومرتني طيوف

واللي بصبره عاش للحين صابر

ينفض غبار الوقت ويدثر حروف

يوم الزمن غابر وماله معابر

هذا وانا ماجيت بارماح وسيوف

ولاجيت قصدي اعتلي للمنابر

ولاجيت ظميانٍ ولاجيت مكفوف

ولاجيت جرّاحٍ ولاجيت جابر

ولاجيت جبّارٍ ولاجيت مخطوف

ولاجيت باولكم ولاجيت دابر

جيت امتطي كلمه يسمونها ظروف

جيت ارتجل معنى بمعنى مثابر

جيت أفرك الصبح بيدي وانسج الجوف

جيت اترك القمره تبيني واكابر

جيت ف شتا حبي وأنا لابس الصوف

جيت بوضوح الحلم في وقت غابر

ودامه سكن قلبي ويرجف من الخوف

خّلوه يبعد ما في قلبي مقابر