أنا ما شفتها اصلاً ولاني منكر اسنيني

اهي كانت حلم غامض عجزت افهم معانيها

اهي كانت بداية حب ولو نفرض نظر عيني

وصارت لي سنين الهم وتركتلي بلاويها

أشبهها مثل زهره تفوح ابكل بساتيني

ولما جيت ابقطفها لقيت الشوك كاسيها

خسرت ابقربها خلان في دربي على ايميني

لجل ارضي غرور اللي تقول اني مجافيها

في دنيا تايهٍ (وحدي) كثير اشياء تغريني

ولما عرفت انا (رشدي) لقتني طايحً فيها

عرفت ان الغدر طبعه واظنه حيل يكفيني

ولا أملك سوى إني أقول اليوم ناسيها

(غدر غادر)(غزى غالي)غدر غدره وغفا فيني

غلا غالي (غلب غالب)(غدى غانم)وغازيها

قصيدي بلسم اجروحي وفي ضيقي يواسيني

الى من ضقت في الدنيا فمالي غير أغنيها

اسميها الوفا احيان واحياناً تجافيني

تداوي اجراحي مراتٍ ومراتٍ اداويها

نويت ابعد عن الاحباب دام انهم مخليني

انا وش لي بطرد اللي يتعبني مقاضيها

أنا رحت بندم وافي وسامعها تناديني

ولكن عزتي ترفض اروح الها واحاكيها

عزمت انهي علاقتنا مدام انها تدنيني

انا مالي ومال اللي تضيعني مراسيها