خلاص قلبي حطّم القيد بالقيد

مسموح ان جيتك وان رحت مسموح

كلمه بقلها لك وتنعاد لك عيد

مزيون جيتك وان توكلت مجروح

كنتي لقلبي فرحة العمر والعيد

كنتي لجسمي بعد موتته له روح

كنتي ظلالي يوم يحرقني البيد

كنتي صباحي لو رفض ليلي يروح

كنتي جنون وعقل والسهل والكيد

كنتي حياة وموت واحزان وافروح

جيتي حقيقه بصوت حلمي اناشيد

وانا طموحي طفلةٍ تنعش البوح

حظي فقير ويوم جيتي غدا سيد

يبني لغيرك صرح ولقلبك صروح

ماني بصيادٍ ولا قلبك بصيد

ومانتي بصياده ولا القلب مسروح

عشنا سنينٍ بطأها صوت عربيد

عشنا فدرسٍ عالبشر غير مشروح

كنتي مثل آيه وانا كنت ترديد

او كنت انا شاعر وكنتي لي النوح

ماجيت أفجّر في مسامعك تغريد

ولاجيت ألبّس خافقك شي مطروح

دامك مع النسمه تروحين لبعيد

دام الوفا بفستان هالقلب ما يفوح

اكتب جيوشٍ فيك ماظن بتفيد

دام الهوى ما ينبتك حلم وصروح

خلاص قلبي حطم القيد بالقيد

مسموح ان جيتك وان رحت مسموح