المصايب زايره والهم في قلبي ضوا

والمصيبه يوم شفت الهم اربكني الصمود

ما لقيت اللي في داخل خافقي يومه عوا

ما لقيت الا بقايا ذيب وآثار الركود

ريح من يمناي هبت حامله صبري دوا

عاصفة دنياي من يسراي جابتلي وفود

الحزن والهم وآثار الفراق اللي شوى

في صميم القلب طيبه لين بيّن عالخدود

والهنوف اللي قلبها في قليبي ما روا

راحت وطرحت ضميري واخلفت كل الوعود

كنّها من يوم راحت ساس قلبي انعوى

هدّت البنيان كله من جدارٍ او عمود

لازم اصبح وآتنقل لين خط الاستوا

يمكن الاجناس فيها عندهم عدلٍ يسود

من بعد ما صار ضلعي ترعشه نسمة هوا

صارت الدنيا عواصف والبخت عيا يجود

الحزن مارد يداعبني مسك يدي لوا

والهموم اتدغدغني وآنا اضحك في جمود

يوم قلبي في خفوقه غير حبها ما احتوى

ليه خانتني أبي من قلبها أسمع ردود

ما نوى الا عليها من بعدها ما نوى

يوم جازت هالوفا مني بنكران وصدود

والمصايب زايره والهم في قلبي ضوا

خايف اتقبّل عليّه واهيا ما ودها تعود