يالله دخيلك من ظلام القبر وإن جاء منزلي

من ظلمة اللحد ومن اللي لاتعدا صاح له

والمشكله لاني نبي ولاشهيد ولاولي

مدري على ويش آصل الجنه بليا راحله

مومن بأنه لاإله الا الكريم المعتلي

كافر بعباد الوجيه اهل الفعول الواحله

ولاموت واقف مثل اجبال نجد وزلزلي

يابيد صدري لانثنى للوقت عبد وطاح له

ويالله فزعاتك انت ولا على جهد عملي

يامن بحر عفوه وجوده مايحدد ساحله

من بعدها ياللي تمر الدرب وان جيت "لعلي"

اضفي عليه اغلى التحايا من قدمه لكاحله

قله وهو بقدر يميز افخاذ غامد من بلي

وش شجرة تنبت على شط الفرات وماحله

مايسفح الدمعه على خده سعيد ولاخلي

مير البلاد مندمعته بين الضلوع الناحله

شفني ليا شفت الدموع إمع المقفي تصطلي

اضحك عليه من العنا واحسده قبل ارتاح له

والشاعر اللي حال بين اقصى طموحي وامهلي

ياما لوى غصن القصيد وكل قمري ناح له

شعر تبي تقراه منآخر مداي لاولي

واللي يبي يقراه قل سحر المعاني لاح له

يحتاج من جمر الخيال اللي على المعنى ملي

حتى ليا مر الكلام العذب ند وفاح له

مير البلا يابو هلا آنا فالزمان المخملي

سلم على هاف الحشا واللي بكاه وباح له