الحظ مفتاح الدروب المغاليق

او قفل بيبان الليال وخطاها

من ليلة الحمى لقتك المعاليق

في ثلجها في جمرها في لظاها

واسكرك ياهم ورا الحدب وتفيق

كل الطعون المرمسات وعناها

ومنين أببدا يا جداد الطواريق

وانتي مواريف الجروح وذراها

من ضيعة السجة ومر المذاويق

ولا من عيوني سهرها وماها

بعض العلوم يجف من دونها الريق

وبعض العلوم يجف ريقي وراها

كحلت عيني من وجيه المخاليق

للساعة اللي ينثني من عصاها

ويومي زبنت العين في موقف الضيق

لقيت من كحل طرفها عماها

بعض اللحى عز بوجه المطاليق

وبعض الوجيه اكبر خزاها لحاها

تغرك ازوال الرجال المطافيق

لو انها ماتختلف عن نساها

هزايل تلهث ورا الهرج وتضيق

من قبل تخلق والزمان أيهجاها

اللى ليا حملتها بالمواثيق

تضعضعت يسبق ميلها رغاها

وياليل وان مريت راع العشاريق

غب الهموم اللي تزايد بلاها

قله طروش القلب جمع وتفاريق

ذود وطى قفر الضلوع ورعاها

ومابين مزموم الورق والشواهيق

ضيع دروبه وان نزلها رقاها