وين اببدا من هجوس الدرب وإلا مفرقه

وين اسندها ولي عامين اداري عوقها

والسهر مرات يسرقني ومرات اسرقه

واسهره حتى يحس بخمرته وبذوقها

والقوافي دمك ان شحيت به والا اهرقه

والسوالف ضيعة الشاري ليا جا سوقها

والبنادم غصن لا ولع يباسه بورقه

لايلوم الا عيون طول الله عوقها

والمراجل ماتجي تبريحتين وادرقه

والرجال اللي تموت ولا تموت حقوقها

والله ان ذبح الرجال اهل البيوت المعرقه

مثل ذبحك يا الحدا ذل بسد حلوقها

والليالي ذوقها باللي مغيبه مشرقه

لا تضيق خاطري لابوك لابو ذوقها

وابك لو العين ماهي من دموعي مغرقه

بين شرس الزمان اللي نهش بعروقها

لو جحدت الملح في عيني وداريت ازرقه

ماجحدت انه يفج الناحله ويسوقها

ذايق مره بحلقي بين امجه واشرقه

واتلعثم بالبيوت اليا سقى طاروقها

وانت ما تدري عن جفون الليال المحرقه

والزمان اللي سكب باقي سهره بموقها

كل مانوخ على كبدي وثنى مطرقه

طحت مدري حدر الارض ابعيد والا فوقها

حالف راس الطويله اللي زمى لي لاطرقه

وان هلكت استلهم الجرة عساك تشوفها