جعل السحاب اللي حرق كبده البرق

ومن حر مايونس تشاهق رعوده

ينقاد لا منه نحر وجهة الشرق

وارزم من الظلمى وستل حدوده

ويثرى ثرى الديرة من الضلع للعرق

ويبيح ماكنه ويذكر سدوده

حتى يزين الكيف للعفر والزرق

ويطيب راع الذود لادك ذوده

دار لها فالحب فرق عن فرق

فيها غلى المغلي ونايف جدوده

اذكر جراهدها ليا ناحت الورق

وان هب تال عصير هفهاف نوده

نجد الغلا والعز والجود والطرق

ذروة سنام الدار مدهل فهوده

من بعدها وين انت يامنادي الغرق

لا ياوجود القلب وأخر وجوده

كم صوت المرقاب يبن أدمي أرق

سجاج والسجاج جرحه يقوده

وانا قتيل العشق واللي طعن درق

كيف اتهم كفه وانا اول شهوده