ايهيلن وينهالن على لجواد
غيض غشمهن فايض طفر بداد
ايهيلن عليهن ديم
ولا قصرن فى نضم لا تحكيم
لجواد يا شريف امعاى يبقوا ديم
نضمت قوافيهم الها رواد
واخذ على تعريفهم تقديم
ليهم مواقف فضل عللعباد
ايفيضوا صحيح بخيرهم تعميم
كيف مايفيض النبع فى لجراد
او كيف ما ايفاجينا السحاب او غيم
على قصر مدة اينورن لسناد
سريعين فى المنطق او فى التقديم
ابلفظ الطيابة شورهم تنقاد
عليها التصور ينطوى تصميم
حديث ما ايملل سامعه يخلاد
ايهيلن اومايرتدن
ايجن من عوالى واسقات ايمدن
اشعاب او روافد عد ماينعدن
اسيولى على نضمك الهن ميراد
ياجدار ماعندك كلام ايشدن
معاك يفزعن مخصوص علجواد
مطلع حديثك له افكار ايعدن
بيه يسرحن مايردهن رداد
اومور بالوراثة وين ماينعدن
ماهن غرابة حبس من لجداد
الجودة وعز النفس كان احتدن
عليهن بلا رادة النا ملهاد
او ليهن قوافى خاصات ايجدن
واضحات فى الحسبة ابناد ابناد
معاك او عليهم ماحدود ايسدن
خصوصاً اللى منهم نباهم شاد
قوى غشم شلالاته
كسر اسدود امسلحة شالاته
زايد طفر متعادية جبداته
عذافة تلوح فايته لحداد
كى وصفهم لجواد كى وصفاته
عليهم اللحق عايشين اسناد
عزيزين مام الحججهم فلاته
فضولين ملقاهم عليك اسعاد
الجار المجاور يغفروا زلاته
وان شاورتهم لك بندروا بسداد
يربوا الهايف يستروا عوراته
لاينجفى لاطق فيه انكاد
سكانت وسيع الجال فى حوزاته
سوى ايقيطنوا والا مع لذواد
بلاهم العالم غايبه نجماته
وبيهم اعلام او عايشين اسياد
ينهالن علمباديهن
لا ايخادعن لا يتركن ماضيهن
وان هايلتهن تلقى اللى ايحاويهن
ينضاح بالى فيه مايجحاد
خصائل حميدة ربنا عاطيهن
واضحات للى يفهموا لبعاد
مان كيف هللى بالحطا باليهن
لباب الكريهة صاعدات اصعاد
الله ايجيرنا مما تخبلن فيهن
واجعلهن فداء الجيد ولد لجواد