عتم سراج الليالي وإنطفى نور العيون

وإنكسر حلم الأماني وإنتكس جفن الكويت

هلت دموع الموادع وإنتشى ذاك الجنون

وإنهدم صرح المعالي يومك لعرشه جفيت

جيت أنا لدسمان أنادي وحدك لأرضي تصون

جيت أبسأل كل شارع شامخ بفخره حييت

وين شيخك وين عرشك وينه الليله يكون

دامه اللي بالمحاني بانيٍ عزٍ وبيت

ياكويت إرمي عيونك شوفي أمجاد وحصون

شوفي شلونه تعلى حلمٍ أرقى ماطويت

شيخنا جابر وأبونا عالعمر هذا يمون

لو يبي فدوه رقابٍ تنكسر لجله وجيت

جيته أرمي كل شيٍ داخلي هم وشجون

لعنبو يوم المفارق إبكي إبكي ياكويت

شققي ثوب الأماني وإنزعي لسان السكون

وإذبحي كل المشاعر ياوطن جرحك حويت

جابر الأحمد أبونا سيدنا درعٍ وعون

أقسم إنك بالمعالي لو على جسمي مشيت

يابعد راسي وكلي يايبه صدرك حنون

من عيونك في حياتي يابعد كلي إستحيت

عالمي كله حبيبي لخاطر عيونك يهون

جابر الأحمد حياتي لا لا لا لا ما كتفيت

شوفها كويتك حبيبي بس لقى عيونك يبون

كل ما هلت نسايم داخل أنفاسي طريت

والمشاعر هي مباني في شموخك يرتقون

يا يبه جيتك أدوّر حضنٍ بداره بديت

قالت طيورك مسافر قلت أنا بكره يجون

إيه نعم فعلا وشفتك ولغلى عشقك قريت

يا شراعٍ للمعالي هادمٍ كل الظنون

مبحرٍ بين المحاني راسيٍ فخرٍ جنيت

شفتك بكل الأماكن عن غلاتك يعلنون

شفتك بعين الطفوله وكل شيٍ له حصيت

شفتك بعين اليتاما من حنانك يرتوون

شفتك بذيك المعالم يا يبه فخرٍ عليت

والشواطي اللي تحبك للمدامع يذرفون

والخليج أبكى عيونه دامك بطيبك طغيت

يسكب الدمع بحشاها جونها ماهو بجون

هذي دمعه من عيونه طاحت بصدر الكويت

طاحت بوسط الخريطه والحنايا يحضنون

طيفك اللي لو عبرها لهامة الدنيا وطيت

إيه نعم لك حقٍ إنك تاخذ العقل بفتون

قلبك اللي بالحنايا طفلٍ لعزه سقيت

هذا ماهو قلب أبدا هذا دنيا وسط كون

لو عبر عنها خيالك في مدى دمي سريت

يا أبو مبارك نحبك والمشاعر يحلفون

يا عسى رحمة سمانا تكلل اللي به سعيت

قمت أحس إن البرايا بالخبر لك يكذبون

ترحل وكل الليالي دونها دمعي رضيت

زلزل العالم رحيلك والمحاني يشهدون

يا يبه كلي فديتك ومن بعد كلي فديت

المعالي في غيابك من عناهم ينتهون

يا حبيبي كل شيٍ إلا بعدك ماهقيت

والمدامع يا حياتي برقها لجلك يهون

من على فرقى خفوقك زاهرٍ صوتٍ وصيت

حافظ الأرض الكريمه كويتك لعزك تصون

مكرمٍ شعبك وكارم دامك بمجدك هنيت

ما تقصر في يمينك والمشاعر زيزفون

عطرها ماله مثيلٍ راقيٍ وإنت رقيت

كل شيٍ في غيابك منحني مثل الغصون

شوفه الشعب الكويتي من على دمعه سطيت

دونك الديره يتيمه بالمواجع يسكنون

شوفها أرضك حياتي قالت لعينك بكيت

وإكتسى حلم الأماني لونٍ أبدا ماهو لون

شوفها كويتك عيوني تكتب اللي به رضيت

كل دارٍ في ألمها تنتثر موت وغبون

والعنا بين المواجع قال تكفى لك شكيت

جيت أبرثي عيوني اللي للمواجع يحصدون

دام أنا حالي يتيمه بالحزن دونك صفيت

بشتك ودربك ونورك دايم بذكرك يجون

آه يا حالٍ بدونك كم لجل أرضك شقيت

كم تحملت الليالي والمشاعر ينزفون

دايم لدارك تعمّر عزٍ كويتي بنيت

ديرتك تبكي غيابك والمحاني يكتوون

ودعت فيها أبوها آه يا عشقٍ عطيت

ودعت كل المعالي وإنحدر دمع العيون

يدعي المولى يزيدك رحمةٍ دايم وليت

ليت روحي ياحبيبي فدوه لعيونك تكون

والقدر ماله خيارٍ دامك بطيبك سميت

عتم القلب الكويتي في غيابك ياحنون

وإنتكس جفن الشوارع يومك لعرشك جفيت

من على دسمان يبكي عزٍ أعلاه الشجون

وأصحبت دارك يتيمه إيه يتيمه يا كويت