أمانه لو غدى طيف الأماني بيننا مقتول

توصيهم علي تكفى مدام ان الزمن فاني

وامانه كل ما تذكر غرامٍ داخلي مشلول

تسابقني على نفسي وجرح بغيبتك جاني

امانه كل ماتروي صحاري شوقنا المبلول

تنادي عمرنا الواحد وتدري مالنا ثاني

على قتلي قوى حرفك يعيش بصدري المعلول

وأبوس إيدك مدام إنك صفعت وجيه خلاني

جفا يقتل مشاعرنا ومنهو بيننا مسؤول

عطش هامت ملامحنا تقول أيامها باني

وجع أكبر من اللي صار نسى إن الغلا معقول

بديت اللي على بالك وصرت العاشق الجاني

وقف صبح العنا يبكي شعاعِ غافلِ مذهول

وطيرٍ كل مارفرف يجيك يدور أوطاني

كرهت الناس بأسبابك وقول إنك تبيني قول

أبوس إيدك تجاملني تراعيني على شاني

أنا مادري وش الاخر مصيري دايمٍ مجهول

لأن الشوق ذابحني عنيد لحسرتي باني

أمانه كل ما يطري عليك هواشنا المعسول

تذكر طيبة قليبي مدامك حافظ ألحاني

أبيك تعلم الواشي محال يذلني وينول

مدامك صدري الوافي بيدك تقتل أحزاني

أمانه لو تناديني بقابل بابك المقفول

وأحب ترابها أرضك وأجيك بصادق ألواني

وأبيك تشوفه قليبي من الفرقى غدى مهبول

يغربلني بعين الناس يوقف عندك أزماني

وأمانه كل ما ودك تصول بطعنتي وتجول

تشوف آخر مواجعنا وجرحٍ بالعنا هاني

وأمانه لو تواعدنا أبيك تقول لي مشغول

أخاف من الغلا أخطي وأدمر آخر أوزاني

وأمانه لاتزودها أخاف ان الفراق يطول

وأموت ولاقوى غيرك يعالج منك إدماني

وامانه لو غدى قلبي من اسباب الجفا مقتول

توصي نفسك تجيني مدام ان الوفا فاني

وأبيك تردلي تكفى تدور للغياب حلول

وإذا زليت في حقك عسى الله يقطع لساني