كتاب عمري وعنوانه ويانصّه

اخذ الجسد خاتمه والروح عنوان

واقسم على اثنين قلبي قسم مع نصّه

خذ نص فهرس .. ونص اجزاء وبيبان

ياللي مزاياك بالتعذيب مختصّه

عذّبني احيان .. بس ارحمني احيان

في الحالتين انت فيني صايدٍ خَصّه

قل ليه ؟ أقول لْك بأن الوضع خربان

حبّك ملكني خلاص وخربت الرصّه

لو ما أنت سلطان .. بس الحب سلطان

درست في مدرستك أربع مية حصّه

وخليتني ملك بايدينك على شان

اضحك واجاملك لو مدري وش القصّه

واصير غلطان لو ماني بغلطان

قدرت مني حماس القلب تمتصّه

بديت تكسب رضاي ان كنت زعلان

وقدرت تقطع شريط القلب وتقصّه

وانا اتفرّج واصفق لك وفرحان

على عماها وانا مدري وش القصّه

ماني بغلطان .. لا مليون غلطان!