ذا قول من غنّى ومن هاض ما خفى

بدت لي وغيري جاهل(ن) مادرى لها

إصحى تكن روع(ن) إالى شفت حادث

تزري تميّز حرمها من حلالها

إلى اوجعك ضرسك خذ القاز واقلعه

وإن كان في عينك فدوّر دوا لها

ترى حلاة الرجل لا شقّ يرفا

ذرب(ن) يميّز فتلها وانحلالها

عيب(ن) على اللي بدّل الهدر بالرغا

ولا كلّ من يبغى المراجل ينالها

وانا ما بلاي الا سباع(ن) تقانبت

تناطف ملا كمها وجرّ العوا لها

ومن شبّ نار الحرب للنار يصطلي

كثّر مقابيسه وزاد اشتعالها

كم غارة(ن) منّا على فاقة الضحى

يشبك على روس المعادي ظلالها

غزينا على الطرسان من دون صارة

أخذنا مغاتير(ن) نذّبح عيالها

كم جادل(ن) من غبنّا تذهل الغطا

ترفع صليب الصوت تبكي عيالها

وكم مهرة(ن) قبّا تجينا قلاعة

رمينا براكبها وفاخت حبالها

أقوله وانا من لابة(ن) تنثر الدما

مناة الحرايب دايم(ن) في قتالها

ذقنا حلاويها وذقنا مرورها

ولو هي صفت يوم(ن) سريع(ن) زوالها

ولا تفرحوا ياشامتين من العدا

إن طالت الدنيا يجيكم بدالها

حقّ علينا الهجن تمشي مسيمة

وخيل(ن) أصايل معتبين الحذا لها

لعيناك يانجد المسمّى بفعلنا

والاّ منازلنا فلا احد(ن) ينالها

إلى قالوا الحكّام رزّوا بيارق

ننسف على شيب الغوارب ثقالها

ولا عندنا في حلّة(ن) عند حاكم

على الراي حكّام(ن) طوال(ن) حبالها

هذا وصلّوا يا حضور على النبي

أزكى قريش وكلمة الحقّ قالها