كل المدن ..
بتشد روحك للسكن
وانت اللي كاره فيها نبض الإغتراب !
الصمت باب اخرس ..
بيفتح لك طريقك ..
للمطر ..
للخطوه لمَّا تحدفك ..
جوّه الغياب !
نبضك بيخرج برَّه عن طوعك ..
يرفرف ..
للبيوت اللي ابتدت ..
تبهت وشربت كل ألوان السكوت
الشمس غابت جوّه حضنك
والطيور اتغربت عنك وطارت
وانت فارد ..
من جناح الصبر مركب ..
والوطن عنك بيرحل ..
وسط موج الحيره .. صخر الدهشه ..
نار الأمنيات !
كل اللغات البكر دبلت ..
وانتهت فيك المعاني .
وانكتب " ع " الفجر " مغلق " ..
وانت راحل ..
بره ذاتك .. أغنياتك ..
ضحكتك ..
للنهر لمَّا يشد روحك ..
وانت راحل ..
عن خيوط الحلم / عنك ..
عن سماوات الحقايق ..
والوطن ..
بيداري عن روحك ..
مناديل ا لوداع !