إقفل زراير حلم .. ممكن يسترك ..
إيه تاني عايز منُّه غير الستر .. ؟
ليه ..
مربوط ف ديل الحلم غاوي يجرجرك ..
ويلف بيك ..
كل الحارات الضيقه
ويخبي عنك ..
بنت كانت ف انتظارك تبتسم ..
إيه كان لزوم الحزن م الأول ..
وليه ..
ضي ابتسامتك بحر يابس ؟
لو قدرت تمد إيدك ..
تقطف الشمس البعيده .. مدَّها ..
هتلاقي بعد الشمس عن يدَّك .. يشدَّك ..
يبعدك ..
أسفلت خط الرجعه لمَّا يسيح ..
تتوه ..
تنبح عليك كل الطرق ..
تنهش خطاوي الفجر منك ..
يتولد عاجز على عكاز ..
يموت من غير كفن !!
إزاي يفوت بين القبور ..
وهموم كتير ..
رفضت تفارق جثته
اتشعلقت فيه الثواني .. والدقايق ..
والعقارب والساعات ..
وعيال كتير ..
مشفوش ابوهم من زمن
إيه كان لزوم الحلم م الأول ؟
وليه .. ضي ابتسامتك بحر يابس ..
أعترف .. إنك بتعشق صرختك ..
لم اللي غاويين الهروب ..
واحدف لهم شحنة سراب ..
متحمِّله عصافير .. تطير ..
مسافات كبيره هتتولد .. بين اللقا .. والانتظار