1
طالع أنا ..
من نن عين المحرومين ..
المكتوبين ف الحسبه ، بعد الفصله ، ..
أصفار " ع " الشمال !
ف كفوفي طعم الملح .. طعم الخل ..
فوق الاحتمال ..
لمَّا الشتا ..
يصرخ ف جوف المحرومين ..
ويعري ف قلوبهم حنينهم للغطا ..
بيموت على كفِّي السؤال !
2
ساكن أنا ..
جوَّه الصبيَّه اللي ابتدت ..
تكره بياض " التُلّ " ..
وتخاصم زهور الفُل فستان الزفاف !
وهيَّه لسه بتستعيد الذكريات ..
تدخل ف جوف الصبر وتعد الساعات ..
يمكن زهور العمر تطلع ..
أو عبير الروح يعود ..
روح الحبيب اللي انكسر ..
م الوقفه " ثابت " ع الحدود !!
تحت المطر والسلك شايك ..
والصخور والليل وأصوات البارود
صعب انه يكتب م العدم ..
رغم الألم .. رغم الندم .. صرخة وجود !
3
طاير أنا ..
فارد جناح الرعشه جوّه الصرخه ..
لحظة م ابتدت ..
تدفن وليد الحق وتكفّن ..
ضناها من سكات !
تحفر ف قلب الرمل قبر بدمعها ..وتموت معاه .
4
طالع أنا ..
من صمت صرخة بتنتحر ..
ف قلوب تموت م الحسره ع العمر اللي راح !
والجي رعشه ودمع ناحت ..
ع الخدود نعي الصباح
داير أنا .. من دار .. لدار ..
وكفوفي بتسافر ..
ف حلْق الخلق تسقيهم مرار !
شربوني هم ف دمهم ..
نقشوني وهم ف عمرهم ..
رغم انهم ..
عارفين وشاربين المراره فكل جوف ..
لكنهم ..
ولا مرَّه قدروا يبوحوا ويسموني خوف ..
ولا مرَّه قدروا يبوحوا ..
ويسموني خ .. و .. ف !!!