لمَّا عمود النور الواقف ..
تحت المطره ..
ينزف ضي ف قلب الشارع ..
تشرب ضيُّه ..
أشجار التوت الدبلانه ..
الخوف اللي بيخطف مني ملامح بكره ..
يحدف لي الواد اللي يبعتر ..
أوضة نومي ..
يكسر مني قزاز الروح الأبيض
وتدشدش أفكاره السوده دماغي ..
أسأل نفسي ..
اشمعنى الواد الأيام دي اتغيَّر حاله ؟
دانا كنت مصاحب أحواله ..
دايماً كنت احكيله وكانت روحه ..
نفس الطعم الأصلي للشيكولاته !
وارث نبرة صوت المرحوم جدُّه
حافظ " نهج البرده " ..
رغم انه مركِّب دش ..
وشايف إرسال المستقبل ..
عمره ما غيَّر جلده !
ساكن جوَّاه باحث ذاتي عن عنوانه ..
شارب ضي الشمس وعايش ..
مجنون بالفاكهه الطبيعيه !
طمي النهر الجاري ناحت وشه ..
مهما البحر يغشه ..
ما بيركبش الموجه ..
ولا عاش يحلم ..
بعروسة البحر تغنيله ..
ولا تحكيله ..
عن أحدث صيحات الموضه !
أسأل نفسي ..
اشمعنى الواد الأيام دي اتغير حاله ..
أصبح يصرخ فيَّه .. يبعد عني ..
يدخل أرجاء المعموره ..
يشرب كوابيس الأخبار ،
الشارع ، بوش الإبن ،
الزحمه،
أزمة أنابيب البوتاجاز ،
الغابه ، نادي القرن ، الفيتو ،
أشجار التوت الدبلانه ،
حمدي قنديل ،الإنترنت، الأقصى ،
المولد ، موجز الأنباء ، الشرعية ،
بغداد ، البصرة ، الصحاف ، الكوفه ،
صدام حسين المتعلق فى مشانق
الشيعة ،السنة ، التلفيق الدولى
تومي فرانكس ، طمي النهر الجاري ،
أوضة نومي، الفديو كليب ، المستقبل ،
ياسر عرفات ، الثورة، الحب ، الحرب ، الدوامة
الدوامه..
تحدف لي الواد اللي يبعتر أوضة نومي
يكسر مني قزاز الروح الأبيض ..
وتدشدش أحزانه السوده دماغي ..
اهرب منّه .. وارجع ادوَّر ..
على واد أسمر .. تايه مني !!