شبكت ايديك ..
فـ ايدين الحلم
وحاولت تضمه لصدرك
وقت اللحظه البكر ما كات بتشخبط ..
فوق وشك ..
ألوان للحب الممكن !!
لكن ..
كان الباب مقفول .. جواك ..
" ع " الفتارين اللي بتعرض ..
لحاجات مختلفه ..
منك .. لكن ..
كانت ممنوعه على الناس .. وعليك !!
مع إن الباب شفاف ..
والناس بتبص على الفتارين ..
جوّاك .. وسعيده ..
بتدور على أي طريق ..
علشان تدخل ..
تشتري منك ..
تحفه لحزنك ..
انتيكات لمشاعرك ..
تمثال من أحلامك !
يمكن تفتح قلبك ليهم ..
ولأنك .. خايف ..
إن الناس تشتري منك ..
ما تبيعلكش ..
والبيع يتحول لمزاد !!
رافض تفتح قلبك ليهم ..
رافض صفقة عمرك !!
بس يا دوبك ..
ضامم إيدك ..
ع المفاتيح ..
وبتقفل قلبك ع الأحلام ..
وتموت !!