العمر توب أحلام .. وانا ..
رحَّال لأطول من سنين العمر
ضميت لحضني البحر والسموات ..
ورسمت عنوانك مدى
كنت اللي ماشي ليكي ضده الآه
بعيون بتهرب من ضبابك
كنت أجري .. أجري .. أجري
استخبى فـ ضِلّ صورتك !
وانتظرتك ..تندهيني بروح جديده ..
تغزليلي عمر أخضر
انتظرتك ..
جوّه روحي تكوني صوت
يقتل السهد اللي ساكن فيّه موت
تبتدي تخبيني فيكي ..
م الملامح لمَّا تنشف ..
م الدواير لمَّا تحدف ..
من آهاتي لمَّا تنزف دمع يصرخ ف العروق
تبتدي تشوفي اللي ساكن في الضلوع
اللي باين في الدموع ..
اللي عطشانك رجوع !!
تزرعي ف قلبي السواقي اِمتزاج بينك وبيني ..
يجري فيَّه فرح حضنك ..
تبدريني ف نهر جنه غصن ورد ..
انتظرتك .. انتظرتك
بس ليه ملقتش رد ؟
والتقيت حضنك متاهه تلف بيَّه ..
تحضنيني يجف حضنك
تعصريني كل مرّه .. ألف مرّه
تكتبي من بين ملامحك .. ألف لأ ..
تقفلي عـ الفجر بابك ..
ترفضيني ف اختيارك ع الملأ ..
وحدي فيكي .. ضعت مني
رغم إني .. عشت ليكي ..
فوق مرايتك ..
شفت نفسي ألف مرَّه ..
كل مرّه بألف صوره ..
كل صوره ..
مش بتشبه ليَّه خالص ..
غصب عني ..
مش هَامِدْ ايديَّه تاني لسحر صوتك ..
مِدِّي إيدك .. ارسميني ..
ارسمي البرواز لصورتي ..
حدديني ..
حدديني ..
قبل م الألوان تسيل ..
من بين ملامحي ..
وتلاقيني ..
جوَّه نهر العمر فيكي .. ورد نيل !!