يامحمد خل جرحي لعله مايطيب

انت والله كفو لكن ماعندك دواه

ياكثر صبرٍ صبرته على اسئلتك واجيب

كل ماجاوبت لاول تقول اللي وراه

حالتي ماهي غريبه ولا فيها غريب

اكثر العالم تمره وتبحث له خفاه

حالة العاشق ليا من فقد صوت الحبيب

فضل القبر وعذابه على طعم الحياه

من دخل في غبة العشق لايمكن يثيب

ان غرق ولا تعلق على حبل النجاه

غير كان اقفابي الحظ الأقشر والنصيب

لايصيبك كان قفيت شكه والشتباه

انشد اللي صار جرحي من اسبابه عطيب

واحدٍ مالي من مشاهد عيونه غناه

كل مابعد من دياره أحس انه قريب

ماكلٍ حالي غرامه وساحرني حكاه

ان تحاكا هرجه الذ من طعم الحليب

وان تبسم قلت سبحان خلاق الشفاه

وان مشى سبحان منهو على خلقه رقيب

كن الأرض اليا وطاها تقول الله معاه

جادلٍ غيره من البيض معطيهم صليب

جعل يصبح من نصيبي وانا غاية مناه

واحدٍ لاقلت عطني يقول آمر وأجيب

وكل ماسولفت يصغيلي بكل انتباه

لادعاني قلت لبيه يالغصن الرطيب

وان دعيته قال لبيه لي ماقال هاه

وان شبح بالعين لديت من مابي صويب

نظرةٍ في حاجبيها مفاتيح الغناه

ميّزه ربي بعينٍ ليا مدت تصيب

ميزة ماهيب في كل من تلبس عباه

الشريف العاقل الفاهم الفطن الأديب

جل من سواه سبحان خلاقٍ عطاه

لاعطاني وجهه السمح حثيت الخبيب

واتنهت كل ماصد وأعطاني قفاه

اكتب بيوت القصايد على شانه وأجيب

اجمل حروف القوافي ولا توصف غلاه

من نشدني قلت طيب ولا ابغى لي طبيب

ولا انا يابري حالي وياكبدي وآآآه

آه من جور اليالي ومن غدر الصحيب

وآآه من طول المساري ومن حر اللضاه

وآآه من همٍ كتمته تحت ضلعٍ صليب

وآآه ياقلبٍ تجافى وانا ادرى وش بلاه

وآآه من وقفة عدوي عليه الله حسيب

وآآه من قل النشاما ومن طعم الشفاه

يالطيف اروح دنياً بها شيٍ عجيب

كل مادورت لي صاحبٍ قفى وراه

ليتني مارحت ادور وضواك النصيب

استشم الجرح الأول وعاد اللي كواه

لايغرك قولتي لك ترا قلبي صعيب

المحبة تلحق العاشق المغرم مداه

والله اني من رجالٍ يضدون الحريب

لكن الوقت انتحابي ولا صلح خطاه

غير دامك يامعرب من النسل العريب

لد صوبي والتفت لي وأخذ مني وصاه

فارق همومك وريّح وضنك لايخيب

والله انك راس مالي ومفتاح الغناه