بديت بذكر من تطلب عبيده

ارضاه ورحمته عمت عبيده

بعد ذكر الولي هاضت قرايح

ضمير الشاعر وقال القصيده

قصيده مالها وضعٍ مخصص

تطرق له مواضيعٍ عديده

مدام الشعر لامني بديته

ان زال الهم ولا مايزيده

فباخذ لي معه لحظات سجه

واقدر خوته وافك قيده

انا شاعر قنوع بما تهيا

من الجزلات واتعب للفريده

ولاكن شرط لامنه عطاني

يقدرني ولا يعطي زهيده

انا من عادني جاهل وقدني

رجل عاقل وقاف الشعر اجيده

هويت الشعر من عصر الطفوله

ونشبت من المحبه في وريده

وهو بادلني الود وتعهدلي

انه مايخلي له شريده

وسلم لي مفاتيح القصايد

وقال الشعر فيدك وانت فيده

نعم تستاهل اتسمى مميز

وتاج الشعر تاجك ياعميده

فقلت اخجلتني ماذيب مدحه

آخاف اغتر وتسير تعويده

انا قبلي فطاحلة القصايد

تجيك ابياتهم جزله مفيده

بعضهم لاهداه الله وغنى

.يليّن بيته اطراف الحديده !

يجيب البيت فيه الفين معنى

وازيدك شاعر ويسوى بديده

وانا مانيب لاتالي ولا اول

انا شاعر ويشهد له رصيده

انا ماهمني والله شهره

لجل تلفاز ولا في جريده

ولا همي بعد لاقلت بيتي

تقول الناس عيد البيت عيده

انا قصدي فقط بعض الخلايق

اُناسٍ عاشت الدنيا بليده

تجنب عن طريقي قبل لازعل

وابادل من مشى بالكيد كيده

وصلت اقصاي ماعاد اتحمل

فمن احذر فقد انذر كنيده

وانا حذرتهم لحدٍ يعاند

ويفطر عينه من الزود بييده

نصيحه يابليد ارفق بنفسك

ترا عندي لك علومٍ جديده

لاتتعب نفسك بنفسك وتجهل

تفاخر عندك أن نفسك عنيده

نصيحه : هد روحك لاتزايد

وركد فوق راس بليس حيده

فكانك تحسب انك راس همي

فلنا بسيد الشعر ولنته بسيده

الووم الناس واثر الناس مثلي

تلوم اللي تردا عقب جيده

لكن باغيّر الموضوع منك

مدامك صرت يالطارد طريده

مدام انّي على نهج افتخر به

فأنا ماهمني سيدك وسيده

انا شاعر مفكر لي اسلوبي

طموحي للمواضيع الفريده

احبك البيت وجزال المعاني

وتقرب لي ليا فكرت بييده

ولا اسوي قصيده دون معنى

وانضمها لجل كلمه وحيده

لا والله مأشعر الا فيه حاجه

تشب بداخلي نارٍ وقيده

أو امدح لابتي فيها وأعدد

فعايلها مواقفها المجيده

أو اهدي للوطن قمة عطائي

وعرفان لحكومتنا الرشيده

أو انصح من قبل مني نصيحه

ولا انصح كون باشياءٍ مفيده

أو امدح صاحبي لاحل ذكره

وأقول الّّزم عسى ايامك سعييده

طراة الشاعر اليا منه غنى

يجيب البيت يسوا له نشيده

وانا من عادتي لاقلت بيتي

اخلي بيتي اسنينه مديده

ولا اعارض ابن آدم في قصيدي

واقول ان ذا هبل وان ذا وليده

اروح بفالي وكلن بفاله

وأعيّد عيدي وكلن وعيده

ولو بالغت في مدحي لروحي

على غم الحسود المدح ازيده

والى منه انتقدني قلت عادي

باعيده ثم باعيده ثم باعيده

على غمك على الغمة تعلى

قدم رجلي بخطواتٍ حميده

ياربي كفني زلت لساني

ولا يمسك علي كلمة زهيده

بديت بذكر ربي والنهايه

بذكر اللي تصلي له عبيده