من ميزتي رفقتي ترقاء سنود وبيان

ماحسب رفيقي رفيق الا لاوالله شقيق

رفقة شرف وافيه ماهيب ترضاء الطمان

ميزه ولا كل رجلٍ حطها له طريق

ادمح خطاء صاحبي واقف بوجه الزمان

اللي يحد الصديق يبت حبل الصديق

وارفى خمل حضرته لاجات عشره ثمان

وأخاف يشره علي لاقلت ذا مايليق

اصد عن غلطته لوهي عيانٍ بيان

ماقوم اولع بقايا ماحصدنا حريق

ياصاحبي وانت فارس كيف زل الحصان

كيف يتعثر حصانك وانت فعلك عريق

وشلون تكد خبر مافيه شاهد عيان

ويروح ذاك البري في موج بحرك غريق

ياصاحبي ويش حدك دون نظم السمان

تطلق سراح البيوت اللي خلفها شهيق

عطيتني بيت واحد بس مايستهان

قصدك تشراه لكن جات عكس الطريق

احزنتني وأجرحتني .. كلمتك يافلان

وعذربت في رفقتي وانا لك اوفى رفيق

مادام في رفقتي عذروب والنقص بان

ليه اجبرك وانت جالك في سنعها مضيق

بالأمس خوة شرف فيها العلوم الثمان

واليوم خوة شرف لاشك دمها يريق

ان قلت مالي فعل ماغير هرجة السان

فالظاهر انك تكلم في سباتٍ عميق

وان قلت زوم.. وكبر.. قلت الله المستعان

مأنت بعلى قلب صالح يارفيقه تويق

صحيح انا اخلفت وعدي بس ظرف الزمان

حكمه يخلي الرجل ينشف ويبّتل ريق

( من لا حضر معركه فلاتعده جبان

عده جبان ان حضر وأخر خبره الطقيق )