على موقفك من ليلة عرفتك لين هذا اليوم

ما هزك كثر تقصيري معاك ولا تغيّرتي

تخيّرت الجفا عنوة وهذي حيلة المحروم

فقير ألا من أحزانه ولكن وش تخيّرتي؟

تكونين أول انسانه تبيع البعد بأول سوم

وتشرين الوصل غالي ولا مره تكاثرتي

عظيمة يا منى يفطر شعورك بالوصل ويصوم

نقيّة تسلبين الغيم طهره لا تباشرتي

كريمة يا منى مدّة خفوقك تغني المعدوم

أميرة وبرغم هذا ولا مرّة تأمرتي

خجولة يا منى حضرة جنابك بالخجل محشوم

رقيقة كنك النسمة ومستغربك ما طرتي

وفيّة يا منى وأكبر دليلٍ يثبت إنّك يوم

دريتي بأمر احزاني بقيتي ما تنكرتي

وقورة يا منى يزهى الوقار ويكتمل ويدوم

معك وليا تكبرتي يليق ولا تكبّرتي

يحزّ ف( خاطري ) أكسر خفوقك وآخذ المقسوم

من أيامك واخليني على دربك ليا سرتي

ولكنّي ما اعرف اعطي وهذي عادة المحروم

يا ليتك قبل لا أسوّي سواتي بك تغيّرتي

على كلٍ عليّ اللوم وانتي ما عداك اللوم

لأني مت بدري يوم ف( وصولك ) تأخرتي