الوضع يبغاله دراسه وترتيب

مليت من رتم الحياه الممله

قم ياقصيدي وانت شيخ المناديب

رح قلهم واللي على الدرب قله

سويتهم وسط قلبي معازيب

لانهم ربع ورفاقه وشله

عاملتهم بالطيب لكن وش الطيب

الطيب بعض احيان كنه مذله

حتى التجني له طريقه واساليب

لكن هذولا زادو الطين بله

اهل الردى والمصلحه والاكاذيب

تجمعوا من كل مذهب ومله

اطيبهم اللي مايودي ولا يجيب

يسبني والا يسب المجله

واعقلهم اللي لو يخط المكاتيب

ماهو منافس غير شكله وظله

ان جتهم طلعت في روسهم شيب

وان طولوها قلت سيفي واسله

ماني بقايل يمكن تصيب وتخيب

الحبل اعقده وارجع شوي احله

اغيب وارجع كني السيل واغيب

وابقا عطالله والعطايا من الله

يعني على قول المثل وش على الذيب

بنشوف منهو ياكل الجو كله

قصيدتي تلقا حفاوة وترحيب

والشعر يكتب لي شكر في سجله

انا عدو الكذب والحقد والعيب

ما اصافح الطيب عشان استغله

اللي يفتش عن عيوب وعذاريب

ان ما سكت ولا يجيب الادله

واللي يبيها بالشعر والمواجيب

اقلب عليه الطاوله في محله