والله واللي لاإله الا هو الحي العليم

انك ولا غبتي دقيقه في منامي وسهري

حاولت اروّح في حياتي وامسك الدرب السليم

وادوس قلبي وارمي حمولي ويرتاح ظهري

وفشلت لانجح وابتعد والنار شبّت فالهشيم

واصبحتي بكل اتجاهاتي وقدام نظري

عامين ما ذقت الهنا والعين ماشافت نعيم

لله در الحب ماسوّى ويبلاه جدري

ماجيت لك مهزوم جيتك والمحبة فالصميم

فقير من قلبٍ حواني وقت واحساسي ثري

ماكنّي الا بين خلق الله من فراقك يتيم

والقلب قاسي بس فالظاهر وهو جداً طري

والله يوم اذكر زمانٍ راح في هبة نسيم

انّي اسافر مع دروب الحب واقطعها جري

ياسيّدة حرفي وروح احساسي وعشقي القديم

وانا اكتب حروف القصيده ذي وقف كل شعري

تعبَت مراسيل الغرام الروحي وحالي سقيم

وجيت اقول الكلمتين اللي انشبت وسط نحري

إمّا تعالي يا هواي وكرّمي قلب الكريم

ولا عسى الله لا يسامحك ان سمعتي بخبري