دق الجرس للحصه وقام الجمل

يشيل معه اقلامه وكراسته

رايح على فصله ويحدوه الأمل

يلقى نتيجه صح من حماسته

امّا يطيح بطالب ونعم وأهل

للعلم ويقدّر عسله وكاسته

ولا يطيح بطالب يقشّر بصل

ودفاتره عاله على دبّاسته

ومن لاقرصه النحل ماذاق العسل

ولاينفعه كرسيّه ولا ماسته

والعلم نورٍ يعمي عيون الجهل

والجاهل اللي يتبّع وناسته

ومن لا احتزم بالعلم فالدنيا خبل

ومن لايدوس الجاهلّيه داسته

ولنّ المعلّم شي اساسي ما غفل

دوره هل العلم الصحيح وساسته

قد خصصوا له يوم في كل الدول

يذكّرون اللي نسوا قداسته

واليوم يومك يامعلّم يابطل

يامن ربط تدريسه بدراسته

وهو عمل لكن مهو بية عمل

رسالةٍ للي معه فراسته

يبني من عيال الوطن سور وجبل

تقدر على شيل الوطن وحراسته

وجنود للدين الحنيف اللي كفل

نصرة رجالٍ تنصره لرياسته

و(نعم نعم للجد لالا للكسل)

مبدا المعلّم دايماً وسياسته

صحيح ما شال الحمول الا الجمل

والله يعزّ اقلامه وكرّاسته