ياهجوسي على ظهر السحابة وصلّي حملة الأشواق خلي

تمّ ردي سلام الله علاه وقولي إنّه معنّيني فراقه

علّميه ان عيني ما تهنّت وان دمعي على خدّي يهلّي

وان روحي بلاها اللي بلاها وان قلبي على رجله وساقه

بعد ماشبّ ناره في ظلوعي كيف ابنساه وانسى ما حصلّي

يشهد الله مالي فيه حيله صار ثابت كما رقم البطاقه

لاتذكّرت ما بيني وبينه قمت واقف وانا جالس محلّي

مايلوم الهواوي غار واحد في دروب الهوى قطّاع ساقه

ليت من لامني ينظر بعيني في حلايا الغزال المترف اللي

ساق كل المشاعر في طريقه كنّه الراعي اللي مع نياقه

إن ضحك لي بسنّه راح بعضي وان رمش لي بعينه رحت كلّي

وان بدى في سواليف المحبّه قلت يالعنبو كل الرفاقه

وان تغلاّ عليّه ربع ساعه ما بقى في عروقي ربع ملّي

وان زعل لو شويّه قمت اقلّب في ملف المحبه والصداقه

واقف قبال عيني ما يغيب الزين واليا فقدته مثل ظلّي

وان رقدت يتهيّا في منامي لين سوّى مع احلامي علاقه

ياشيوخ القبايل فالقبايل واحسبوها على سلمي ودلّي

قوموا اعطوني المزيون ولاّ سقت رجلي على درب الحماقه