السفينه والبحر والهبايب والشراع

اختصار لعمر الانسان فالوقت الغوي

عمره وعقله ودنياه تبقى في صراع

لين ياصل للنهايه غني ولاّ خوي

والهوى والنفس وابليس ثالوث الضياع

من يعاندها على الخير يكويها كوي

والحياه تغرّ الانسان والدنيا متاع

والذهين اللي مشى صح فالدرب السوي

واوّل الدنيا لقا واخر الدنيا وداع

والوداعه في يد الخالق الفرد القوي

بعدها يمّا على نعمةٍ دون انقطاع

أو على نيران تشوي فرايصنا شوي

يالله إنّك لا تورّدني ادروب الخداع

والزمان الشين لا يلوي ذراعي لوي

يوم افكّر فالحياه وتفاصيل النزاع

أثرها حفنة ليالي ونطويها طوي

ما اسرع الأيام تمشي خطاويها سراع

كنّها ناقة هجن فوقها ورع بدوي

امس ادوّر فاللعابي وانا قطعة وراع

والسنه هاذي ثلاثينة الذيب تعوي

وش بقى فالعمر مدري شبر ولاّ ذراع

الوكاد ان انفجار الصدر يدوي دوي

لامتى والقلب لا هو هجوم ولا دفاع

ولا متى والدمع لعيون ابو ريما خوي