طال إنتظار الدلو ياجمّة البير

والما يموت وحبل الايام جاير

وانا تعبت من الصبر والمشاوير

لين القدم خاوت دروب العثاير

مشت على جمر الغضا والمسامير

واثر الحياه مربعات ودواير

وخطوط حمرا للرجال المناعير

مافرّقت بين الحضر والعشاير

والصبر زين وكل مطرود في خير

ملحوق لويسري على جنح طاير

لكن صبري يازمن غير في غير

مااصبر عن الماوالعطش فالضماير

عمري سنابل والدقايق عصافير

تاكل من ايامي وانا اموت حاير

إنشد ظلام الليل كيف البواكير

تنزل على قلبي وتالع صقاير

صارت همومي عند قلبي طوابير

من سبّة الفرقا وبُعد البشاير

واحزان قلبي بين جهم ومغاتير

ترعى من القلب الخضر والعباير

وانا انتظر مثل المواني بوابير

وافلّ حبات الخرز والستاير

وارسم مضاليل الهدب والمناخير

على الزوايا باصبعي فالغباير

والله لو عندي جناحين لاطير

وانزل على عشب وغرام وظفاير

وارد على منهول ست الغنادير

والمّها بين الجروح الغواير

لكن وصلي مالقاله معاذير

وافراقها مثل الذنوب الكباير

مااقول غير الله يلمّ المناثير

ويصبّر المكسور نيل الجباير

دام إنتظار الدلو ياجمّة البير

للما يموت وحبل الايام جاير