قالت وانا رابط حزام الامتعه تكفى بلاش

لاتحرّر الدمعه وتستعبد نهار عيونها

كانت تقف بين الامل والياس حول الارتعاش

وانا اقف بين الصبر واخر نزيف طعونها

ركبت راسي وابتدى المشوار واحتد النقاش

والهم زمّ عروقها حتى تغيّر لونها

الله واكبر يازمان الورد واسراب الفراش

طرى على بالي وانا لحظه واغادر كونها

والذكريات تجرّني مابين غفوه وانتعاش

لهيب نار الجمره اللي ولعت غليونها

قمت اتذكر سالف الايام والضحكه بلاش

يوم القلوب الصافيه تعكس لنا مكنونها

كانت وكنت وكانت الدنيا تردد عاش عاش

تعزف على عود الوتر واعزف على قانونها

كنا نغني نطرب الدنيا فرح والحب كاش

ونهمّش العشاق لا ليلى ولا مجنونها

لاهزّت القامه غنج اصير انا مثل القماش

وتلفني مثل العباه اللي تلف متونها

والوعي يفقدني غصب ويصيبني مثل الرعاش

لاحطت الشفه مابين سنونها وسنونها

واليا اضحكت غار البرد ومن البياض يغار شاش

ويرقّص الخفاق في صدري جمال لحونها

والموت لافكت ظفايرها على وجه الغباش

يتلعثم لسان الخيال ويرتبك مفتونها

الله واكبر كلما هلت حواجبها وطاش

عقلي على قوس القزح ليا ظهر بجفونها

ماغير اكابر واتماسك واثرني طلعت ماش

ماعاد لي حولٍ ولا قوه غلبني هونها

ويروح في مطلوبها وقت الطلب مليون لاش

الا ليا وقّف على ضلع الكرامه نونها

حرام بالله ماتعيش بداخلي لحظة معاش

لكن خطاها ما يبرّر لي كسر عرجونها

والعفو عند المقدره يامعطي العشره طناش

دينٍ على كبار الرجال اللي تسد ديونها

قررت انا باربط حزام الامتعه ولا بلاش

ابحبس الدمعه وابا احرّر نهار عيونها