يضيق صدر الليل وتهلّ عبره

سحابها خلف الظلوع النحايل

تزهر على خد المناديل جمره

واتشبّ في صدر الزمان الفتايل

أثر المواقف بعض الاحيان خطره

لوكان ماعندي عليها دلايل

لكنّها ترسل على القلب شفره

يفكّها حدس العقول الثقايل

لاعاد ياقلبي على الناس تشره

لاصار حظّك فاكثر الناس مايل

يروح عشره منك ويجيك عشره

صَنعك من ايام الهوى والهوايل

تذلف ولاهزّت من الراس شعره

علاقةٍ ماتحتميها الفعايل

واللي يقلّل قدري يقلّ قدره

لو كان شيخٍ من شيوخ القبايل

يكفيك ياراسي على الارض شجره

تاقاك باذن الله لهيب القوايل

والوقت مثل السير والعمر بكره

كلٍّ يروح محيل ويجيك حايل

ومن لابنى في داخل القلب قصره

وش عاد لو انّه يشد الرحايل

مازادني حيره وغصّه وحسره

ألا سليلٍ من كرام السلايل

العام حط السم في ثوب تمره

واخذتها في جنبي وقلت هايل

واليوم اشوفه عايش بظل طفره

يقصر عن حضور الكرام الجلايل

ومن يذكرك فتره وينساك فتره

تأكد انّه شاف غيرك بدايل

ياليه تحداني على الكره واكره

وتحطّم حصون الغلا والجمايل

وتلبّس همومي فساتين سهره

تنشر على نور الصباح الجدايل

وتموت عبره منك وتعيش عبره

محبوسةٍ خلف الظلوع النحايل