حسنك جنون.. وانتي تلبسين الحمر

ما قويت احتويه بحسي الشاعري

يا ملاك الانوثه تامريني امر

بالذي تطلبينه آمري.. آمري

كيف اردك؟! وانتي في جمالك قمر

ليه اردك؟! وغيرك ما ملا ناظري

لك حلاة خذتني.. لا شهد.. لا ثمر

في قوام نحيل وبالمفاتن ثري

وشعرك اليا على كتوفك طغى وانهمر

يقدر يبيع في عمري وهم يشتري

اسرفي في وصالك واغمريني غمر

قد ما تقدرين بهالمسا كثّري

خوخ لا لا كرز لا توت منجا تمر

طعمك احلى.. اخاف يصيبني سكّري!!

زاد حملك وشاله فيك عود ضمر

ويل قلبي عليك وبري حالي بري

صرت انادي لرمشك: يا طويل العمر

كنه حاكم وانا في خدمته عسكري

من لمست الخدود اليانعات السمر

بخت كفي من ابهامي إلى خنصري

كل صبع بعد ما كان خشن ومر

صار طعمه جلكسي في طعم كدبري

فيك غبت بربيع وفيك ذبت بجمر

وفيك شيء لقيته بس ما ينطري

يوم طيفك على عيني لقيته يمر

ما اقدر المشي وانا من هواة الجري

مسلم بس سكرت وما سكرت بخمر

سكرتي من جنونك يا القوام الطري

لو بيدي لخلي هالمسا يستمر

في ربوعه هناي وكل ما احتري

وآمري واطلبيني لو تبين العمر

كيف اردك وغيرك ما ملا ناظري