هذا هو الحسن و انتو سامعيني يا

حلوات ذا حسنكم ما عاد يغريني

هي شي ثاني و انتو جنبها أشّيا

متكررة باهتة ما قد ملت عيني

هاذيك لميا و الا من مر لها طرّيا

شفت الكدر من عنا دنياي يجفيني

هاذيك لميا ملاكٍ بيننا تحّيا

همت و غلاها تغلغل في شراييني

دلوعةٍ مالها أشباه بالدنّيا

يا لعنبوها انوثة لاعبة فيني

روفي و انا شاعرك ظميان يا لمّيا

وانتي ترى ادرى بْوش اللي منك يرويني

لي قلب غالي لغيرك بالهوى عّيا

تستاهلين الخفوق و تستحقيني

و انتي خفوقك الا منه غدا ليّا

ماعاد ابي أصدقاي و لا محبيني

هاذي يديني تعالي و اقبلي هيّا

و اوعدك أصدق عشق تلقيه بيديني

بكتب بك اشعار تاخذني الى العلّيا

في قمة الشعر و الإبداع تلقيني

دامك معي ما تكوني للغزل ظمّيا

كلما بغيتي غزل بسكات (ضميني)

كل المطامح بحبك تنتهي فيّا

وش أبغي اكثر الا صرتي تحبيني

آبيع نصف العمر لك و اشتري لقّيا

و آعيش عذب المشاعر بينك و بيني