ودعتها وقالت أشوفك على خير

ومن يومها والحال صار يتردّا

من يومها تفكير تفكير تفكير

والفكر ياما جاب فيها وودّا

وش غيّر الدنيا وهي من قبل غير ؟

ليه الزمن ويّاي دوم يتحدّا؟

وليه الشقى ماله بقلبي معايير ؟

من بد خلق الله جعلني مبدا

أذكر بحزتها فقدت التعابير

والدم بعروقي تثاقل وهدّا

سألت نفسي عقبها ويش بيصير ؟

ثار العرق من فوق جفني وندّا

سألتها وأبغى لهالبعد تفسير

ردّت علي : تحبني ؟ قلت : جدّا

قالت : أشوفك صرت ضمن المشاهير

والظاهر إني فعل ماضي وعدّا

شاعر وحولك يكثرون الغنادير

وقبل اتّعشاني نويت أتغدّا