لله در الشعر لافاض نزفه

تروى به الاوراق من قبل الاقلام

من ضاع له حقٍ تباشر بنصفه

ومن رد حق الله وحق البشر نام

لاتجعل (الله) عرضه وسهل حلفه

ولاتحلف بغير (الله) خلاق الانام

ربي خلقنا ثم رحمنا بلطفه

وبعض البشر مثل البقر تعبد اصنام

والكذب الابيض سلعةٍ حل صرفه

روج لها الكذاب لاتصير سوام

من عورةٍ يخرج هالانسان نطفه

ويدخل بعد في عورةٍ وسط الارحام

دم يتكون في ظلامٍ بغرفه

أربع شهورٍ دم واوجاع وآلام

ينفخ به الرحمن من بعد ضعفه

وتصير له يدين وعيون واقدام

تسعة شهورٍ بين خوفٍ وكلفه

تسعة شهور تزيد او تنقص ايام

ترعاه عينٍ ماتنام وتحفه

طفلٍ ضعيفٍ هش من لحم وعظام

من عورةٍ يخرج وصيحه تزفه

طفل انولد واصبح شعوبٍ واقوام

لو قلت له وش فيك تهتز كتفه

مارد معروف بصلاته ولاصام

يضرب بعرض السور عقله وعرفه

صارت حياته طيش في طيش واوهام

لو جيت تتكلم رفع فيك طرفه

كنه نسى كم (عورةٍ عاش واسقام)

(ليه التكبر) واولك كان (نطفه)

وبآخرك (جيفه ومترين من خام)