كسرت انا ضلوع الحنايا وشبيت

ناري وطرا ياعزوتي كل مافات

وباصابعي جمعت الاوراق واركيت

صدري وفاحن القصايد والابيات

واركيت كوعي فوق شوقي وصبيت

فنجال شعرٍ اشقرٍ فيه طربات

كنه جديل اللي من الكون حبيت

اشقر على متنه معثكل وخصلات

واليوم في شعبان حايل تقهويت

واطلقت عيني بين شوقٍ ونظرات

غرقت عيوني بدمعها بس شحيت

ماودي افضح شوق صدري بدمعات

قيدت خيل الشوق بالصدر واخطيت

اثر الغلا يذبحك يذبحك بسكات

من ديرة الخفجي ركبت وتعنيت

صرت احسب الساعه وياقشرالاوقات

صارت دقايق ساعة الشوق توقيت

صارت ثواني لهفة العشق ساعات

كم عقربٍ في ساعتي مات تنهيت

كم ساعة ماتت بأأأأهٍ وأهات

من يوم ماطروك ياذربة الصيت

من يوم ماطروك ياحايل الذات

لبيت من زود الحميا وفزيت

يالعنبو حي الحميا ليا جات

قالوا تعال وجيت في ذمتي جيت

لعيون اهل حايل ركبت المسافات

مبطي وقلبي بين ياعل ياليت

اكتب بأهل حايل ولو بعض كلمات

والحين من الله على ماتمنيت

فرصة عمر واغرقتها بالكتابات

لو هو بكيفي كان (ماكان رديت )

منهو يجيكم تغبطه كل الاصوات

عز الله ان الشعر من قبلكم ميت

كن الورق وديان وابياتي اموات

مادامي الشاعر وانا ماتباطيت

مادامكم جمهور للشعر مامات

جمعتها في طول حسي وناديت

كل النياق ان كان للشعر خلفات

سقت القصيده بيتٍ وبيتٍ وبيت

لعيونكم سقت الغلا بكل الابيات