كنك تقول شرايكم يوم عديت

من جنبنا ( بس جيتنا في أوانك )

مثل السحاب اللي برق يوم هليت

كن الدلال تفوح من زعفرانك

ياللي سرقت الحرف من مخلب البيت

(ياهووه) ياكلمة (هلا ) في لسانك

غنيت لك ( أسمر عبر ) يوم مريت

حضرت (أبو نوره ) (هنيا) عشانك

وكملتها (مثل القمر )يوم فليت

مجدولك اللي لاعبه خيزرانك

كنك تبي تغث القمر يوم صديت

أصلاًتحطم بأبتسامة ثمانك

لا ما أ كتفيت بلعب شعرك وهزيت

خصرك ووريت (الكمنجه) حنانك

والظاهر أنك (ب .. اللعانه ) تماديت

كنك تشمت بالحرير بليانك

ياصفقة الجمهور ( يومن لفيت )

وداعبت طارك في عذوبة كمانك

(أثرك تقول لغيرك من النسا جيت )

أثرك تبي تموتهم بعنفوانك

غنى لك الجمهور من يوم طليت

ياليل دانه دان ياليل دانك

كن الزمن منك أشتكى وانت عييت

كن الزمن روح وسير زمانك

بعض العرب في طلته ( يقعد ) الميت

كنه غصب حضرتك تخسر رهانك

غنيت لك ( أسمر عبر ) يوم مريت

وكملتها ( مثل القمر ) بس عشانك