لا انت من بطن الشعيب ولا انت من راس الطليعه

ولا ستر عورة دجلك فبردك الهريان ثوبك

عدت الثنتين والثنتين لا عدت شنيعه

دوك ذنبٍ ياهبيل الراي يسوى بك ذنوبك

وش بلى دروبك قصيره وانت خطواتك سريعه

من كثر ماهي سريعه يتجه حضرتك صوبك

شايلٍ غمدك بليا سيف سدا للذريعه

منجّم ياراعي التيهات والمنفى دروبك

قاصرٍ عذرك سمين ولا تواخذك الشريعه

خابرٍ عوجا سلومك ماانجبت شلفا حروبك

ناقصٍ ماتكمل الاشعار وش ودك تشيعه

باخصٍ كذبك شمالك لويصدق بك جنوبك

لاتدورها وخف العقل مالازم تطيعه

لاتذيرها وتتعب يامخطوف الراي بوبك

يالوضيع انفض شليلك عن مماشيك الوضيعه

هستروبك يامليص القلب مبطي وابلشوبك

شرقوا بك خابت الهقوه وضيقت الوسيعه

غربوا بك ليتهم ياليتهم ماغربوا بك

وين ماناخت ركابك تكشر انياب الفجيعه

وش علامك ماانت قد السالفه من صدقوبك

انعم ابرك لك يابو تشرين في حي الوديعه

ولاتحرث النار خل النار شمر مادروا بك

ساقطٍ في حصة التاريخ ما احسنت الصنيعه

خامدٍ ماولعت نارك ولا هبت هبوبك

لا تغرك زحمة التصوير وعيون المذيعه

ثوبها يستر حياها وانت مايسترك ثوبك