كثر ماعشت أنا الفرحه بقربك واضحكت لي عين

وكثر ماعشت متهني وكثر ماابتسمت اشفاتي

وكثر ماقلت في حبك قصايد جمّعت قلبين

أشوف الوقت من دونك جمع همي ومعاناتي

غدا وقتي مثل ليلٍ طويلٍ ماانتهى للحين

سواده امتلى بصدري وسالت منه دمعاتي

حشا من يوم ماغبتي وربي ماغفت لي عين

طغى همي على عيوني ولعب في حسبتي وذاتي !

أنا من رحتي بفالك وتلعب بي هموم البين

وتاهت خطوتي بعدك وتاهت بي مساراتي

وأنا وشلون أصور مامضى ويّاك في سطرين

وست شهور ياعمري تغني فيك أبياتي

قضيت شهور في وصلك مضت لي كنها يومين

فداها سنين من عمري وفداها كل لحظاتي

ألا ياحبي الطاهر أبيكي دائما تدرين

بأن طاريك إذا مرْني رفع لي معنوياتي

حياتي يابعد عمر القصيد وخاطر الغالين

أنا لخاطر عيونك بس أضحي بكل رغباتي

أضيع ليا طروا إسمك ولو جابوه غلطانين

وأنا لاضعت من حبك عساها دوم ضيعاتي

وحبك من سكن قلبي أحسه في حياتي دين

لأني بس من شوفك أحقق كل طموحاتي

ترى من قبل لاشوفك لعبت بحسبة الباقين

ولاحد عارف قلبي ولا يدري بغاياتي

قضيت الحب من قبلك ولاأدري طريقي وين

وأشوف اللي تعلق بي يضيع بصمتي واسكاتي

وجيتي اليوم ياذوقي ورتبتي خفوقي زين

وأنا من لمْسَتْ كفوفك رسمت أحلى بداياتي

أشوفك وردة بعيني وباقي هالبشر من طين

وأخاف إني أعبّر لك وتخذلني عباراتي

وأنا في خاطري كلمه ترى باقولها وتكفين

أبيكي تفهميها زين وأبي تصغين للآتي:

حشا مهما كتبت من القصايد والشعر تبقين

بأنك أحلى من كل القصايد يابعد ذاتي