هذا غيابك مرني الليلة ويقريني السلام

وانا غيابي حاضر الليلة في زهو الأسئله

غبتي غيابٍ ماترك لي غير حزنٍ مستهام

في وحدتي يبني على عرش إنكساري منزله

من علمك تبنين بغيابك معاويل الهدام

في ذاكرة صوت نما بسمك وفي الذات اشعله

انتي بداية كل ما لاينتهي عطر الكلام

انتي نهاية كل ما لا يبتدي شوق ووله

انتي ملامح طفل شده نبض صدر امه ونام

تقرا بوجهه من شفاة امه حنان وبسمله

صمتك ظلال الغيم.. لمع البرق.. هتان الغمام

بوحك عصافيرٍ عطت للضي غي السنبله

بسمتك فرحة ضيف جايع في قرى بدوٍ كرام

ومعذبه من كثر جوده فك صدره وادخله

انتي ليا قلتي احبك ثارت الدنيا قيام

واحس كني في بدايات الطريق من أوله

وانا متى ما قلت احبك يرتجف جفن الظلام

والصبح يتنفس مكاني والصعيب استسهله