ياهل التوحيد ورجال الوفا

يوم توحيد الوطن يومٍ كبير

كل شئ نحمد الخالق صفا

ما نقصنا لا قليل ولا كثير

عقب هاك الوقت الآشهب والحفا

والجهل والظلم والشر الشرير

والعداوه في بلدنا والجفا

ودورة الايام بالمر المرير

حل شيخ الدار من صبح ورفا

جرح وقت في جسد داره خطير

وحول اللي في ظهر نجد اردفا

نجد مركب حاكم ماله خشير

يرحم الله راس من عف وعفا

عن خطا اللي سلم بعقل بصير

حل وأثبت في هل الرأي ونفا

في جموع أهل الفتن صاح النذير

وشد مشراب من الضيم انكفا

وأقعده مليان من حلو الغدير

إن مشا في نجد يهتز الشفا

ربطه بخيوط عدلٍ من حرير

إن هفا ميزان غيره ما هفا

بالعداله والعدل قر القرير

شب نور الحكم والشر إنطفا

والزمل ترغي عقب هاك الهدير

والفهد قاد المسيره لا ضفا

ثوب مجد العدل وأصبحنا بخير

والمواطن من ندا الخير اكتفا

اكتفا اللي كان مجهول المصير

في ظلاله كل مشموس غفا

الله اللي خالق راسه يجير

ما على الله ياهل الطوله خفا

روسنا به فوق والصاير يصير

من عطانا وجه ما يعطي قفا

نخوة يكبر بها قلب الصغير

موقظ الفتنه يرقد بالدفا

قبل علمٍ شر يومه مستطير

الحكم والدين والشرع احلفا

منهجٍ يجبر بها العظم الكبير