قال الذي يلعب ابيوت فصيحه

من ضيقته يلعب حسينات الامثال

يا القلب انا بهدي عليك النصيحه

هرج القفا بالك تحطه على البال

ماشوف به كود العنا والقميحه

من بين غادين الجدا قال ما قال

ناس يحسبون النميمه مديحه

وهي توصف من خبيثات الاعمال

زلة صديقك لا تجيلك نحيحه

لو كان عايل قل حشا اليوم ما عال

عزه عن الهكمه وزين سميحه

خله على وجه البعيدين رجال

ما كل نفس من عناها مريحه

لابد ما يبدي لكم بعض الاحوال

ليا بدت بعض العلوم الصحيحه

كل ذكر مجناه من حيث يحتال

احد تنجا حقته من نطيحه

واحد بودي للشريعه وما قال

رجل بلا ربع سوات الذبيحه

تطاه شمطان اللحي وطية انعال

الشر تحدثه الوجيه الوكيحه

سبة هبيل تبتلش فيه عقال

يابدر يوم انك تضاعفت حالي

الحال ماتنعم على ضيقة البال

بلاي فعل الفجعتين التوالي

اللي سبايبهن سلب قوة الحال

يابدر يوم السبت ياما جرى لي

من واهجٍ خلا المعاليق تجتال

وادعت يوم السبت تالي عيالي

اتلى العهد به يوم للقبر ينشال

وقفت عنده موقفٍ حسن بالي

والرمل فوقه ينسفونه بالاشبال

صفقت بالكف اليمين الشمالي

ونّيت ونة من علية الدهر مال

مالي سوى رحمة عزيز الجلالي

اللي خذا مني حبيبي ولا سال

عز الله انه بات بالقبر غالي

وليا تذكرتة تذكرت رجال

الله يبيحك ياشريف المجالي

يا اللي قضى عمرك على طيب الافعال

إلى ذكرت مراق له مضى لي

هلّت دموعي فوق الاوجان همال

بكيت من فقده وكلٍ بكى لي

كل عليك الدمع من محجرة سال

ياسيف لوما جاك حكم الزوالي

تظهر لك اخبارٍ شريفات وافعال

ياسيفي اللي ذاخره راس مالي

ومعدّي عني وحم كل عيال

مرحوم ياعز الرفيق الموالي

وسبع الخصيم اللي من الغيظ مشتال

مانيب عقبة للحياة متحالي

لو قلت ابا نسي سيف تفكير جهال

لاشك وقتي بالطرب ماصفالي

والحمد للي غير الحال بالحال

قبله ثنين من غوالي حلالي

راحوا وهاذي عادة الوقت ميّال

راحوا وخلوني وحيدٍ لحالي

من بين خفراتٍ أيامي وطفّال

يالله كان انّي عليك اتكالي

وأنّي ضبطت النفس من سطوتك ذال

تعوضني في طيبات العمالي

ولا البشر لو دام تاليه زوال

ليا شفت غيري هان تكدير بالي

رضيت بالمقسوم من كل الاشكال

كثر الحسايف مابها راس مالي

واللي من الله مالنا فيه مدخال

صبرٍ جميل الله يقود الرجالي

بالصبر والغفران في يوم الاهوال

في ساعةٍ ماغير ظلّة ظلالي

يجعل لنا عند اهل الخير منزال

وإن كان وقتي مامشى في عدالي

يا من شكيت من الدهر مثلك امثال