يالله يارب الضعوف المساكين

اللي لك المخلوق يحسن صلاته

تستر على غوشن صغارن مكفين

أكبرهم العارف دليله عصاته

لا يا عيالي كلبوكم حبيبين

عندي وعند الناس كلن وذاته

عندي غلاكم يدفن الزين والشين

وعند العرب كلن تشاف اخملاته

يا عبيد أنا خابرك ورعن لهالحين

داوي بغبات الجهل وظلماته

لاشك علمي لك محبه وتفطين

تسمع الوالد وثبت وصاته

وصاة مخلوقن يعرف القوانين

مافاة عمره بالجهل والهياته

يا عبيد انا أوصيك مني بثنتين

ثنتين هن سؤ البشر وحسناته

أوصيك لاتبحث سدود المغيبين

ولاتجهر اللي غارقن بغفلاته

ترى النميمه تمحق الرزق والدين

والمنزل العالي تهدم اطبقاته

لاتحسبن أهل الظليمه بخيتين

كلن يوافق ما عمل في وفاته

وانذرك عن حق الضعيف المسيكين

اللي على حقه يهل اعبراته

ترى الضعيف الليا غدى الليل ليلين

يدعي وعند الله توافق ادعاته

الظلم فان الظلم يفنى السلاطين

ياويل راعي الظلم من مقبلاته

وانذرك عن ربعة رخو من هياسين

اللي سوالفهم بوده وهاته

ويا عبيد الأقشر لوصفا لك نهارين

نهار ثالث جاك يرفع عصاته

والله عندي ربعة الناس الأقصين

ولا صديقا يبلشك في حياته

ترى الرجال ابهم فهود وحياوين

جاك الكلام اللي صحيحا ثباته

ان كان ما تدري ترى الناس دراين

الرجل مدحه بالمجالس طراته

رجلن تعلق به رجالن مسمين

عز الرفيق ولابته والحماته

ورجلن تشوفه جسم وعيون ويدين

ولولا الشعر ما تفرقه من خواته

كم واحد بالبيت يضرب بسيفين

وأن جاء حزم كلاب قبع عبادته

والحلم عن الغيض ينجي الشياطين

يكفيك شر إبليس هو و دحراته