قل لبو نواف ما فيها عذار

انتوينا بالسنافي للمسير

كان ابو نايف تحصل له مدار

دوره والا دفعنا له بشير

قل لبن عون الوعد تالي النهار

بالمثلث لا يسج والا يحير

اعتجل يوم الهوا ذعذع ودار

ترك الراضه وعذر فيه مير

كان عندك بالبنا تالي جدار

اجله والعيد مافيه اتعمير

يم ابوسلطان عزم الفكر دار

يم غيره لا تقول ولا تشير

خلهن يمشن من الديره لدار

المواتر صافيه والدرب جير

مثل ابو سلطان له حق يزار

جيته بالعيد مظهرها كبير

سجة عنده تزيد بها العمار

يدله الخاطر ويرتاح الضمير

في محل كد جلسنا به مرار

مدهل الحكام والزاعل عثير

مجلس يؤخذ بعين الاعتبار

صاحبه يا عز من هو له عشير

دلة فيها من الحبشي بهار

ومنسف يشبع ضيوفه والقصير

نادر له نطحت الموجب شعار

فاهم بالمرجله در غزير

مالبس ثوب الشهامه مستعار

وارث طيبه من الوجه السفير

احمد اللي له تواريخ قرار

بالكرم وبسلة السيف الشقير

انشد التاريخ يعطيك اختبار

عن تواريخ السديري بتعبير

اقر ديوان الخليفه كان دار

شف مقاله عنه بالخط الاخير

شف مراكيضه على قب الهمار

يوم سفك الدم غاد له هدير

كان ابو سلطان همساته كبار

تابع عود على دربه يسير

والعلوم كبار واحلاها القصار

زبدة الموضوع وأحلاه القصير

ما بنيت الملحمه بيت جدار

كود ناسبها على فعل شهير

كان المعروف هالوقت اشتهار

السديري مع هل الجود خشير

مابنا السمعه على ملس العذار

مابناها الا على فعل ثمير

انشد اللي سمع بفعول الكبار

نور الاول يقتبس منه الاخير

يوم وقتي عقب ابو زيد استدار

اجتبرت بحابر العظم الكسير

شمت اللي فيه خصلات اخيار

الذكاوالدين والعرض الستير