البارحه حسةٍ فالصدر وانساقت

يالله بعفوك وغفرانك وسامحنا

امن المقادير جا للنفس مالاقت

اعمارنا درس والدنيا مسارحنا

لو ضاقت الارض قلنا الارض ما ضاقت

ماغيّرت دورة الدنيا ملامحنا

يالصاحب اللي يمينك عز ماباقت

تفرع بها ساعة الهيجا وتفرحنا

رفاقتي معك مازلّت ولا هاقت

الا سنود العلا ترقاه وافلحنا

مانيب جاحد فعول الطيب لاتاقت

الجحد نقطع يدينه مايصافحنا

حنا دمحنا خطاك ونفسنا راقت

حرصٍ علي عشرتك قدام تدمحنا

ياليت عينك بصدري فالخفى واقت

قدام في خنجرك تطعن وتذبحنا

الواجب إنك ليا شفت العرب حاقت

توقف لهم واجب الرفقة وتمدحنا

وإن قلت غلطة وحق النفس ما ذاقت

وين الثقة قبل فالبارود تقدحنا؟

ياصاحبي لو تتوق النفس واشتاقت

للي مضا قلت لك ماعاد تربحنا

ارجوك والنفس شالت فوق ما طاقت

خلّ السوالف بصدرك لاتجرحنا

وإن شفت شرهة سعد فوق الحكى فاقت

قل عذرها رزقنا وإلآ مصالحنا

اليا انثنت خطوتك فالدرب وانعاقت

قلنا سلام الموادع وانت بايحنا