بسم الله الرحمن وله الحمد رب العالمين

(وأمسيلمه كذاب ومحمد رسول الله نبي)

يالله عسانا من حساب الراكعين الساجدين

في يوم سودان الوجيه أهل المهاباه اتهبي

إن غبت ماغابت علوم الطيبين الغانمين

وإن جيت سقت أقدام رجلّى لين تاصل مطلبي

تجارب الرجال وأفعاله وعبرات السنين

مثل القناعه كنز لايفنى وزاد ومشربي

ماعاد باقي شيء ما جابه لسان الاولين

والشعر هيض وغيض ولساني فصيح ويعربي

لكّن هبي يا ذعاذيع القصيد المستكين

شمال وألا من جنوب الدار هبي وأجَنبِي

حنا لقينا العلم واضح لايسار ولا يمين

واضح وضوح الشمس ما يحتاج له فتل أشنبي

نشوف سيل الضلع لاحوّل وسط جوف البطين

يالله خير الناس تبغى شي والدنيا تبي

ماهو كلام ألا الحقايق كلبوها فرض عين

يعني بلاش الخلط بين البشت وخيوط العبي

تصبروا والصبر مفتاح الفرج للصابرين

قلنالكم من عام ماش أعراش في راس الظبي

مناهج التنقيح ما فادت مع العقل الفطين

العام يركض فالفياض الخضر واليوم أيحبي؟

يا مسرّبين المفرده يامعايدين القريتين

ما عاد باقي غير ضحكة سن وأركد يا صبي

تشعبت بأفصولها والحق مايرضى ثنين

والوضع مزرى والحظوظ أحظوظ ماتسبا سبي

أخيل برّاق السما وأعرفك يالجنب المتين

وأقدر أميز في ذكا الرجال وأعرف الغبي

ياشبل أبوك الليث ورثك الشجاعه والعرين

مابيك في تال الزمان أتقول مافاد أتعبي

الرجل لامنه طمع يطمع على العلم الثمين

وأنته لياهالحين يا حسّابة الوقت أحسبي

والذيب لامنه نوى ينوى على الكبش السمين

ما لد عينه في هزال الكبش لو تدبي دبي

الي متي وأنته تقول أتزين وألا ماتزين

زرقا اليمامه شوفها ياصل حدود المغربي

وإن كان راحت مابقى دون الحلوق ألا اليدين

لايّاك ترجع ضايعٍ جهدك وراس المكسبي

أذهن حقوقك لاعدمتك وأتبع العلم اليقين

(أمسيلمة كذاب ومحمد رسول الله نبي)